परदेस

रोज रात समंदर में जवार जब -जब आइल

फूट गइल छाला मन के ,आँख भर आइल 

पानी में डूब गइल सपना के पिटारी 

ओकरा में रहल हमर घर अउर अटारी   

नदी -तालाब  पाटके ,हम कैसन  सपना लायब

चाँद तलक सीढ़ी मगर चाँद  हाथ   न आयब 

इ कैसन देस ह बाबा ! इ कउन माटी

अंखियन में रेत भरल जियरा  निचाटी

होरी अऊर धनिया के जे रहलन आँख के   जोती 

छूट गैलन गाँव में पीछे हीरा-मोती

अमराई नीलाम भइल,बोझ भइल दूना

सोनचिरैया छोड़ गइल ,महल-गाँव सब सूना

बिन पनहीं रेत पर अब त चलल न जाला

लाख क मनवां खाक भइल, अब कौड़ी में बिकाला

काँकर-पाथर जोड़ के ,काँकर -पाथर भैनी

आवत रस्ता याद रहे ,जावत भूल गइनी

फाग-दिवाली करत-करत दिन बीतल  कई बरसों

अब अपने सूरत गैर भइल ,कल जाईं के परसों .

वीणा सिंह